تلگو فلموں کے مشہور ہیرو مہیش بابو کو ای ڈی کی نوٹس
تلگو فلموں کے مشہور اداکار مہیش بابو کو انفورسمنٹ ڈائریکٹوریٹ (ای ڈی) کی جانب سے نوٹس جاری کی گئی ہے۔ اس نوٹس میں انہیں 28 اپریل پیر کی صبح 10.30بجے پوچھ گچھ کے لئے حاضر ہونے کی ہدایت دی گئی ہے۔ ای ڈی نے سورانا اور سائی سوریا ڈیولپرس کمپنیوں کے سلسلہ میں یہ نوٹس جاری کئے ہیں۔ بتایا گیا ہے کہ مہیش بابو نے ان دونوں کمپنیوں کی تشہیر کے لئے چیک کی شکل میں 3.4 کروڑ روپے اور نقد رقم کی صورت میں 2.5 کروڑ روپے، یعنی مجموعی طور پر تقریباً 5.90 کروڑ روپے بطور معاوضہ حاصل کیاتھا۔حال ہی میں ای ڈی حکام نے سورانا انڈسٹریز اور سائی سوریا ڈیولپرس پر چھاپے مارے تھے۔ ان چھاپوں کے دوران سکندرآباد کے بوئن پلی علاقہ میں واقع سورانا انڈسٹریز کے ایم ڈی نریندر سورانا کے گھر سے بڑے پیمانہ پر نقدی برآمد ہوئی۔ اسی طرح سورانا کی ذیلی کمپنی سائی سوریا ڈیولپرس کے ایم ڈی ستیش چندر گپتا کے گھر سے بھی بھاری رقم ضبط کی گئی۔ دفاتر سے کئی اہم دستاویزات بھی قبضے میں لی گئی ہیں۔ واضح رہے کہ چند دن قبل ہی سائی سوریا ڈیولپرس کے ستیش کو سائبرآباد پولیس نے گرفتار کیا تھا۔ متاثرین کی شکایت پر الزام تھا کہ وٹی ناگولا پلی میں ’وینچر‘ کے نام پر عوام سے رقم وصول کر کے دھوکہ دہی کی گئی تھی۔ اس کیس کی بنیاد پر ای ڈی نے سائی سوریا ڈیولپرس کے خلاف تحقیقات کا آغاز کیا۔
