نظام آباد کے نوی پیٹ منڈل میں ایک افسوسناک واقعہ پیش آیا، جہاں شادی کی خواہش میں تاخیر پر برہم نوجوان نے اپنے والد کا گلا گھونٹ کر قتل کر دیا۔ پولیس کے مطابق ملزم کی شناخت مہی پال کے طور پر ہوئی ہے، جو اننت گری علاقے کا رہائشی ہے۔
تفصیلات کے مطابق مہی پال اپنے والد پر مسلسل دباؤ ڈال رہا تھا کہ وہ جلد از جلد اس کی شادی کروائیں۔ تاہم، شادی میں بار بار ہونے والی تاخیر کے باعث مہی پال غصے میں آگیا اور اپنے والد کو گلا گھونٹ کر ہلاک کردیا۔ قتل کے بعد ملزم نے واقعے کو طبعی موت کا رنگ دینے کی کوشش کی اور رشتہ داروں اور محلے کے افراد کو والد کی موت کی اطلاع دی۔
مقامی افراد کو لاش پر موجود زخموں کے نشانات مشکوک محسوس ہوئے، جس پر انہوں نے فوری طور پر پولیس کو مطلع کیا۔ پولیس نے موقع پر پہنچ کر لاش کو تحویل میں لے لیا اور پوسٹ مارٹم کے لیے بھیج دیا۔ ابتدائی تفتیش کے بعد پولیس نے قتل کا مقدمہ درج کرلیا اور ملزم سے پوچھ گچھ شروع کی۔
دورانِ تفتیش، مہی پال نے اپنے جرم کا اعتراف کر لیا۔ پولیس نے مزید قانونی کارروائی شروع کر دی ہے اور کیس کی گہرائی سے جانچ کی جا رہی ہے۔
