پیرس، 06 ستمبر: ہندوستانی کھلاڑی پروین کمار نے جمعہ کو پیرس پیرا اولمپک 2024 گیمز میں مردوں کی ہائی جمپ ٹی64 کے فائنل میں اپنی بہترین کارکردگی پیش کرتے ہوئے طلائی تمغہ جیتا۔
پروین نے آج یہاں کھیلے گئے فائنل میچ میں 2.08 میٹر کی ذاتی چھلانگ لگا کر طلائی تمغہ جیتا۔
ٹوکیو پیرالمپکس گیمز کے چاندی کا تمغہ جیتنے والے پروین کمار (ٹی44) نے اس بار اپنی زبردست کارکردگی سے چاندی کے تمغے کو سونے کے تمغے میں بدل دیا۔ اس کے ساتھ پروین نے علاقائی اور ایشیائی ریکارڈ بھی بنائے۔
اس تمغے کے ساتھ ہی پیرا اولمپک گیمز میں ہندوستان کے تمغوں کی تعداد بڑھ کر 26 ہو گئی ہے۔
گووند گڑھ، نوئیڈا، اتر پردیش میں پیدا ہوئے پروین نے بین الاقوامی اسٹیج پر شاندار کامیابی حاصل کی اور ٹوکیو پیرالمپکس 2020 گیمز میں تمغہ جیتنے والے سب سے کم عمر پیرا ایتھلیٹ بن گئے۔ وہاں انہوں نے مردوں کے ہائی جمپ ٹی64 زمرے میں 2.07 میٹر کی شاندار چھلانگ لگا کر چاندی کا تمغہ جیتا۔
انہوں نے ایشین پیرا گیمز 2022 میں 2.05 میٹر کی چھلانگ لگا کر طلائی تمغہ جیت کر ایشیائی ریکارڈ توڑا۔ پروین نے حال ہی میں ورلڈ پیرا ایتھلیٹکس چیمپئن شپ 2023 میں کانسے کا تمغہ جیتا تھا اور پیرس پیرا اولمپکس 2024 گیمز کے لیے کوالیفائی کیا تھا۔
