گلبرگہ میں سڑک حادثہ۔حیدرآبادکے ایک ہی خاندان کے تین افرادہلاک
کرناٹک کے گلبرگہ میں پیش آئے سڑک حادثہ میں حیدرآبادکے ایک ہی خاندان کے تین افرادہلاک ہوگئے۔پولیس نے بتایا کہ یہ حادثہ ہفتہ کی صبح گلبرگہ کے کملا پورہ تعلقہ میں ماراگوٹی کراس روڈ کے قریب اُس وقت پیش آیا جب کار ڈرائیور نے اس کا توازن کھودیا اور یہ کار، ایک پک اپ گاڑی سے ٹکرا گئی۔پولیس نے بتایا کہ مرنے والوں کی شناخت حیدرآباد سے تعلق رکھنے والے بھارگو کرشنا (55)، اس کی بیوی سنگیتا (45) اور ان کے بیٹے اتم راگھون (28) کے طور پر ہوئی ہے، پولیس نے مزید کہا کہ مہلوک کار ڈرائیور کی شناخت ابھی تک نہیں ہوئی ہے۔ پولیس ذرائع کے مطابق یہ خاندان افضل پورہ تعلقہ کے گنگا پورہ میں دتاتریہ مندر جارہا تھا۔ پولیس نے موقع پر پہنچ کر لاشوں کو مقامی اسپتال منتقل کیا۔
