اکتوبر میں جی ایس ٹی کی مجموعی وصولی نو فیصد بڑھ کر 1.87 لاکھ کروڑ روپے تک پہنچ گئی

نئی دہلی، یکم نومبر: اکتوبر میں سامان اور خدمات ٹیکس (جی ایس ٹی) کی مجموعی وصولی 1.87 لاکھ کروڑ روپے رہی، جس میں سالانہ بنیاد پر 8.9 فیصد اضافہ ہوا۔
یہ اطلاع وزارت خزانہ کی طرف سے جمعہ کو یہاں جاری ہونے والی ماہانہ رپورٹ میں دی گئی۔ جبکہ گزشتہ سال اکتوبر میں مجموعی جی ایس ٹی کی وصولی 1.72 لاکھ کروڑ روپے تھی۔
وزارت خزانہ کے اعداد و شمار کے مطابق اکتوبر کے مہینے میں گھریلو لین دین پر جی ایس ٹی کی وصولی 1.42 لاکھ کروڑ روپے اور درآمدات پر 45096 کروڑ روپے کی وصولی ہوئی۔ سالانہ بنیادوں پر ان دونوں اشیاء کی وصولی میں بالترتیب 10.6 فیصد اور چار فیصد اضافہ ہوا ہے۔
رپورٹ کے مطابق اکتوبر میں مرکزی جی ایس ٹی 33821 کروڑ روپے، ریاستی جی ایس ٹی 41864 کروڑ روپے اور انٹیگریٹڈ جی ایس ٹی 99111 کروڑ روپے تھا۔
وزارت نے رپورٹ میں بتایا ہے کہ گزشتہ ماہ سیس سے 12550 روپے جمع ہوئے تھے۔ اس مہینے کے دوران 19306 کروڑ روپے کے ریفنڈز جاری کیے گئے، جو پچھلے سال کے اسی مہینے کے ریفنڈز سے 18.2 فیصد زیادہ ہے۔ ریفنڈ کے بعد جی ایس ٹی کا خالص مجموعہ 1.68 لاکھ کروڑ روپے رہا۔
قابل ذکر ہے کہ ملک میں جی ایس ٹی 2017 سے نافذ ہے۔ اس مربوط بالواسطہ ٹیکس کے نظام کو ٹیکس وصولی میں بہتری، ملک کی اقتصادی سرگرمیوں کے مضبوط ہونے اور وصولی کے نظام کی موثریت کی علامت سمجھا جا رہا ہے۔