گاندھی اسپتال سے 2 دن کے نوزائیدہ کے اغوا کا معاملہ حل
شہرحیدرآباد کے گاندھی اسپتال سے 2 دن کے نوزائیدہ کے اغوا کا معاملہ پولیس نے چند گھنٹوں میں حل کرلیا۔ نلگنڈہ ضلع کے موتکورگاؤں سے تعلق رکھنے والے سبحان اور شاہینہ کی دو بیٹیاں ہیں۔ حاملہ شاہینہ کو درد کی وجہ سے اس ماہ کی 24 تاریخ کو گاندھی اسپتال کے میٹرنل ویلفیر سنٹر میں داخل کروایا گیا تھا۔ اس نے اسی دن ساڑھے دس بجے ایک بچے کو جنم دیا۔ اگلے دن شاہینہ کو ڈاکٹرس نے کچھ معائنے تجویز کئے جن کو کروانے کیلئے وہ گئی۔ واپس آنے کے بعد بھی اس کا نوزائیدہ نظر نہیں آیا جس پر اس نے اسپتال کے حکام کی مدد سے پولیس آؤٹ پوسٹ میں شکایت درج کروائی۔ سی سی کیمروں کی فوٹیج کی جانچ کے بعد پولیس نے دیکھا کہ بہار کی پوجا دیوی نے نوزائیدہ کا اغواکیا۔سی سی ٹی وی فوٹیج کی بنیاد پر پولیس نے اسے اپنی تحویل میں لے لیا۔ گاندھی اسپتال میں بچے کو بحفاظت اس کے والدین کے حوالے کردیا گیا۔
