حیدرآبادمیں حیڈراکی غیر مجازتعمیرات کیخلاف مہم جاری
حیدرآبادمیں تالابوں اورنہروں کے ایف ٹی ایل و بفرزون میں غیرمجازتعمیرات کو منہدم کرنے کیلئے تشکیل دی گئی حیدرآباد ڈیزاسٹر رسپانس اور ایسٹس مانیٹرنگ اینڈ پروٹکشن (حیدرا)نے کل شب پٹیل گوڑا اور کشٹاریڈی پیٹ میں انہدامی کارروائی انجام دی۔اس مہم کے حصہ کے طور پر کئی عمارتوں کو منہدم کردیاگیا۔ ایک پانچ منزلہ اپارٹمنٹ کی عمارت اور زیر تعمیر 6 منزلہ عمارت کو منہدم کردیاگیا۔ حکام نے پٹیل گوڑامیں 20 سے زیادہ مکانات کو منہدم کر دیا، عمارتوں کے رہائشی علاقوں سے قریب ہونے کی وجہ سے احتیاط سے کارروائیاں کی گئیں۔ رات کے وقت انہدام کے دوران فلڈ لائٹس کا استعمال کیا گیا۔ حکام نے تصدیق کی کہ انہدامی کارروائی غیر قانونی تعمیرات کے خلاف تھیں۔ توقع ہے کہ یہ کارروائیاں جاری رہیں گی۔اس علاقہ میں مزید عمارتوں کو منہدم کرنے کے لیے زمینی کام پہلے ہی کیا جاچکا ہے۔
