محبوب نگر میں چوری کے الزام میں دو افراد گرفتار، 123 گرام مسروقہ سونا برآمد
محبوب نگر، 18 ستمبر (نامہ نگار): محبوب نگر پولیس نے چوری میں ملوث دو افراد کو گرفتار کیا ہے اور 123 گرام کے مسروقہ سونے کے زیورات برآمد کیے ہیں۔ یہ بات 2 ٹاؤن پولیس اسٹیشن کے سی آئی محمد اعجاز الدین نے ایک پریس کانفرنس میں بتائی۔ ملزمان کی شناخت منڈلا مسایا عرف مونڈی چنہ (21) اور منڈلا لکشمی عرف جیوتی (35) کے طور پر ہوئی ہے، دونوں کا تعلق محبوب نگر کے بوائے پلی گاؤں سے ہے۔
ملزمان پرانے موتی نگر میں 15 ستمبر 2024 کی رات ایک مکان سے سونے کے زیورات اور دیگر قیمتی اشیاء کی چوری میں ملوث تھے۔ دونوں مشتبہ افراد جو لوہے کا پرانا سامان جمع کر کے فروخت کیا کرتے تھے، مبینہ طور پر تالے سے چھیڑ چھاڑ کرنے کے بعد ایک بند گھر میں داخل ہوئے اور الماری سے سونے کے زیورات چرا لیے۔
18 ستمبر 2024 کو نیو ٹاؤن اسکوائر میں مشتبہ حالت میں گھومتے ہوئے، چوری شدہ زیورات فروخت کرنے کی کوشش کے دوران پولیس نے انہیں گرفتار کر لیا۔ دورانِ تفتیش پولیس نے ملزمان سے 123 گرام سونے کے زیورات برآمد کیے۔ بعد ازاں انہیں عدالتی تحویل میں بھیج دیا گیا۔
تحقیقات میں ایس آئیز پی. وجئے بھاسکر ریڈی اور ایس کے اوبولا ریڈی کی قیادت میں کرائم ٹیم کے ارکان ایچ سی ایس شیکھر، رگھوناتھ ریڈی، پی سی مرلی، وینکٹ رامولو اور بابیہ نائک نے اہم کردار ادا کیا۔
