مادھاپور میں دلخراش سڑک حادثہ ۔ خاتون ہلاک

حیدرآباد۔ 14 ستمبر (آداب تلنگانہ نیوز) مادھاپور میں جمعہ کی رات پیش آئے ایک دلخراش سڑک حادثے میں ایک خاتون راہگیر ہلاک ہوگئی۔ برکت پورہ کی رہائشی 25 سالہ مادھوی، جو مادھاپور میں ایک کمپنی میں برسرِ کار تھی، اپنی ڈیوٹی مکمل کرنے کے بعد اپنے گھر واپس جا رہی تھی۔

تقریباً 8:46 رات کو مادھوی مادھاپور کے کتہ گوڑہ چوراہے پر سڑک عبور کر رہی تھی کہ ایک آر ٹی سی بس نے انتہائی لاپرواہی سے اسے عقبی حصے سے ٹکر مار دی۔ حادثے کے فوراً بعد مادھوی کو شدید زخمی حالت میں ایک خانگی اسپتال لے جایا گیا، جہاں سے بعدازاں اسے گاندھی اسپتال منتقل کیا گیا۔

بدقسمتی سے، دوران علاج آج صبح مادھوی زخموں کی تاب نہ لاتے ہوئے چل بسی۔ پولیس نے بس ڈرائیور کے خلاف مقدمہ درج کرلیا ہے اور اس حادثے کی مزید تحقیقات جاری ہیں۔