وقف ترمیمی بل بدنیتی پر مبنی :محمد اعظم علی

حیدرآباد۔12ستمبر(آداب تلنگانہ نیوز) سینئر بی آرایس قائد محمد اعظم علی نے کہا کہ وقف ترمیمی بل کے خلاف مسلمان مشترکہ پارلیمانی کمیٹی سے نمائندگی کرتے ہوئے ملی حمیت کا ثبوت دیں۔ صحافتی بیان میں محمد اعظم علی نے کہا کہ یہ بل شریعت اور دستور ہند کے مغائر ہے، اور دراصل یہ بل مرکزی حکومت کی بدنیتی پر مبنی ہے جس کا مقصد اوقافی جائیدادوں کی تباہی و بربادی کے سوا کچھ نہیں۔

انہوں نے مسلمانوں سے کہا کہ وہ اوقافی جائیدادوں اور وقف بورڈ کے تحفظ کے لیے مہم کو کامیاب بنائیں۔ زیادہ سے زیادہ ای میلز اور فیکس کے ذریعے بل کی مخالفت کرنے کی اپیل کی۔ محمد اعظم علی نے مسلمانوں پر زور دیا کہ وہ اتحاد و اتفاق کا مظاہرہ کریں اور اس بل سے دستبرداری کے لیے مرکزی حکومت پر دباؤ بنائیں۔

بیان کے آخر میں، محمد اعظم علی نے مشترکہ پارلیمانی کمیٹی سے مطالبہ کیا کہ وہ بل کے استرداد کے لیے مرکزی حکومت سے سفارش کرے۔ انہوں نے کہا کہ مساجد اور خانقاہوں میں وقف ترمیمی بل کے خلاف مہم میں مسلمان، بالخصوص نوجوان، حصہ لیں۔ انہوں نے مزید کہا کہ کیو آر کوڈ کے ذریعے مسلمانوں کو ضروری طور پر جے پی سی کو بل کی مخالفت میں نمائندگی پیش کرنی چاہیے۔